ನ್ಯೂಸ್ 2 ಡೇ ಕನ್ನಡ ಡಿಜಿಟಲ್ ಡೆಸ್ಕ್:
ರಷ್ಯಾ ಮತ್ತು ಉಕ್ರೇನ್ ನಡುವಿನ ಭೀಕರ ಯುದ್ಧದ ಜ್ವಾಲೆಗೆ ಇದೀಗ ಮುಗ್ಧ ಭಾರತೀಯ ನಾವಿಕರು ಬಲಿಯಾಗಿದ್ದಾರೆ. ಉಕ್ರೇನ್ನ ಒಡೆಸಾ ಕರಾವಳಿಯ ಬಳಿ ವಾಣಿಜ್ಯ ಸರಕು ಹಡಗಿನ ಮೇಲೆ ರಷ್ಯಾ ನಡೆಸಿದ ಭೀಕರ ಕ್ಷಿಪಣಿ ದಾಳಿಯಲ್ಲಿ ನಾಲ್ವರು ಭಾರತೀಯರು ಸೇರಿದಂತೆ ಒಟ್ಟು 10 ಜನರು ಅಸಹಾಯಕರಾಗಿ ಪ್ರಾಣ ಕಳೆದುಕೊಂಡಿದ್ದಾರೆ. ಈ ಪೈಕಿ ಕೇರಳದ ಕಾಸರಗೋಡು ಮೂಲದ ಯುವಕ ಅಖಿಲ್ ಜೋಯನ್ (26) ಮತ್ತು ಉತ್ತರ ಪ್ರದೇಶದ ಅಭಿಷೇಕ್ ನಿಶಾದ್ (21) ಸೇರಿದ್ದಾರೆ.
ಶುಭಕಾರ್ಯ ಮುಗಿಸಿ ಮರಳಿದ್ದ ಅಖಿಲ್: ಕಣ್ಣೀರಿಡುತ್ತಿದೆ ಕುಟುಂಬ
ಕಾಸರಗೋಡಿನ ವೆಲ್ಲರಿಕುಂಡ್ ನಿವಾಸಿ ಅಖಿಲ್ ಜೋಯನ್, ಕಳೆದ ಆರು ವರ್ಷಗಳಿಂದ ಮರ್ಚೆಂಟ್ ನೇವಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದರು. ಕೆಲವೇ ದಿನಗಳ ಹಿಂದಷ್ಟೇ ರಜೆಯ ಮೇಲೆ ಊರಿಗೆ ಬಂದಿದ್ದ ಅಖಿಲ್, ಅತ್ಯಂತ ವಿಜೃಂಭಣೆಯಿಂದ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಮುಂದಿನ ರಜೆಯಲ್ಲಿ ಅದ್ಧೂರಿಯಾಗಿ ಮದುವೆಯಾಗಲು ಎರಡೂ ಕುಟುಂಬಗಳು ನಿರ್ಧರಿಸಿದ್ದವು. ನಿಶ್ಚಿತಾರ್ಥದ ಕ್ಷಣಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡು ಹೊಸ ಜೀವನದ ಕನಸು ಕಾಣುತ್ತಿದ್ದ ಅಖಿಲ್, ಕೆಲಸಕ್ಕೆ ಹಾಜರಾದ ಕೇವಲ ಒಂದು ವಾರದಲ್ಲೇ ಈ ದುರಂತ ಸಂಭವಿಸಿದೆ.
ನೌಕಾಪಡೆಗೆ ಸೇರುವ ಮುನ್ನವೇ 'ವರ್ಲ್ಡ್ ರೆಕಾರ್ಡ್' ಬರೆದಿದ್ದ ಕ್ರೀಡಾಪಟು!
ಅಖಿಲ್ ಕೇವಲ ನಾವಿಕನಷ್ಟೇ ಅಲ್ಲದೆ, ಉತ್ತಮ ಕ್ರೀಡಾಪಟುವಾಗಿಯೂ ಹೆಸರುವಾಸಿಯಾಗಿದ್ದರು. ಹಗ್ಗ-ಜಗ್ಗಾಟ (Tug of War) ಕ್ರೀಡೆಯಲ್ಲಿ ಅಪಾರ ಆಸಕ್ತಿ ಹೊಂದಿದ್ದ ಅವರು, ಕೇವಲ 30 ಸೆಕೆಂಡುಗಳಲ್ಲಿ ಗರಿಷ್ಠ ಸಂಖ್ಯೆಯ ಹಗ್ಗ ಎಳೆಯುವ ಸ್ಪರ್ಧೆಯಲ್ಲಿ ಭಾಗವಹಿಸಿ ವಿಶ್ವ ದಾಖಲೆ (World Record) ಬರೆದಿದ್ದರು. ಕ್ರೀಡಾ ಮನೋಭಾವ ಹೊಂದಿದ್ದ ಕಾಸರಗೋಡಿನ ಈ ಪ್ರತಿಭಾವಂತ ಯುವಕನ ಅಕಾಲಿಕ ಮರಣ ಇಡೀ ಗ್ರಾಮವನ್ನೇ ಶೋಕಸಾಗರದಲ್ಲಿ ಮುಳುಗಿಸಿದೆ.
'ಎಂವಿ ಗೋಲ್ಡನ್ ಲಿಯೋ' ಹಡಗಿನ ಮೇಲೆ ಕ್ಷಿಪಣಿ ಮಳೆ
ಮುಂಬೈ ಮೂಲದ ಓಷನ್ ಗ್ರೇಸ್ ಶಿಪ್ಪಿಂಗ್ ಲಿಮಿಟೆಡ್ಗೆ ಸೇರಿದ 'MV ಗೋಲ್ಡನ್ ಲಿಯೋ' ಸರಕು ಹಡಗು ಒಡೆಸಾ ಬಂದರಿನಿಂದ ಜೋಳದ ಲೋಡ್ನೊಂದಿಗೆ ಹೊರಟಿತ್ತು. ಈ ವೇಳೆ ರಷ್ಯಾದ ಫೈಟರ್ ಜೆಟ್ಗಳು ಹಡಗನ್ನು ಗುರಿಯಾಗಿಸಿಕೊಂಡು ಮೂರು ಕ್ರೂಸ್ ಕ್ಷಿಪಣಿಗಳನ್ನು ಹಾರಿಸಿವೆ. ಈ ಹಡಗಿನಲ್ಲಿ ಭಾರತ ಮತ್ತು ಸಿರಿಯಾದ ಒಟ್ಟು 17 ಸಿಬ್ಬಂದಿಗಳಿದ್ದರು. ಭೀಕರ ದಾಳಿಯಲ್ಲಿ 10 ಜನರು ಮೃತಪಟ್ಟರೆ, ಇನ್ನು ಕೆಲವರು ತೀವ್ರವಾಗಿ ಗಾಯಗೊಂಡಿದ್ದಾರೆ. ಉಕ್ರೇನಿಯನ್ ನೌಕಾಪಡೆ ಕ್ಷಿಪ್ರ ಕಾರ್ಯಾಚರಣೆ ನಡೆಸಿ ಕೆಲ ಸಿಬ್ಬಂದಿಯನ್ನು ಪ್ರಾಣಾಪಾಯದಿಂದ ಪಾರುಮಾಡಿದೆ.
ಮೊದಲ ಕೆಲಸದಲ್ಲೇ ಮುಗಿದುಹೋಯಿತು ಯುವಕನ ಉಸಿರು
ಇನ್ನು ಈ ದಾಳಿಯಲ್ಲಿ ಮೃತಪಟ್ಟ ಉತ್ತರ ಪ್ರದೇಶದ ಡಿಯೋರಿಯಾ ಮೂಲದ ಅಭಿಷೇಕ್ ನಿಶಾದ್ (21) ಜೂನ್ 10 ರಂದಷ್ಟೇ ಮೊದಲ ಬಾರಿಗೆ ಈ ಶಿಪ್ಪಿಂಗ್ ಕಂಪನಿಗೆ ಕೆಲಸಕ್ಕೆ ಸೇರಿದ್ದರು. ಬಡ ಕುಟುಂಬದ ಬೆಳಕಾಗಿದ್ದ ಏಕೈಕ ಮಗನನ್ನು ಕಳೆದುಕೊಂಡ ಹೆತ್ತವರು ಕಣ್ಣೀರಲ್ಲಿ ಕೈ ತೊಳೆಯುತ್ತಿದ್ದಾರೆ. ಮಗನ ಮೃತದೇಹವನ್ನು ಭಾರತಕ್ಕೆ ತರಿಸಿಕೊಡುವಂತೆ ಹಾಗೂ ಕುಟುಂಬದ ಜೀವನೋಪಾಯಕ್ಕೆ ನೆರವಾಗುವಂತೆ ಯುಪಿ ಸರ್ಕಾರಕ್ಕೆ ಮನವಿ ಮಾಡಿದ್ದಾರೆ.
ದಾಳಿಯನ್ನು ಉಗ್ರವಾಗಿ ಖಂಡಿಸಿದ ಭಾರತೀಯ ವಿದೇಶಾಂಗ ಸಚಿವಾಲಯ
ಈ ಕೃತ್ಯದ ಕುರಿತು ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಭಾರತದ ವಿದೇಶಾಂಗ ಸಚಿವಾಲಯ (MEA), "ವಾಣಿಜ್ಯ ಸರಕು ಸಾಗಣೆ ಮಾಡುವ ನೌಕೆಗಳ ಮೇಲೆ ದಾಳಿ ನಡೆಸಿ, ಮುಗ್ಧ ಸಿಬ್ಬಂದಿಗಳ ಪ್ರಾಣಕ್ಕೆ ಕಂಟಕ ತರುವುದು ಸಂಪೂರ್ಣವಾಗಿ ಅಸಮ್ಮತ. ಸಂಕಷ್ಟದಲ್ಲಿರುವ ಭಾರತೀಯರಿಗೆ ಅಗತ್ಯವಿರುವ ಎಲ್ಲಾ ನೆರವು ನೀಡಲಾಗುತ್ತಿದ್ದು, ಪರಿಸ್ಥಿತಿಯನ್ನು ಹತ್ತಿರದಿಂದ ವೀಕ್ಷಿಸಲಾಗುತ್ತಿದೆ" ಎಂದು ಸ್ಪಷ್ಟಪಡಿಸಿದೆ. ಮೃತ ದೇಹಗಳನ್ನು ಭಾರತಕ್ಕೆ ತರಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಕಾಸರಗೋಡು ಜಿಲ್ಲಾಧಿಕಾರಿ ಅರ್ಜುನ್ ಪಾಂಡಿಯನ್ ತಿಳಿಸಿದ್ದಾರೆ.
