ಕಾಸರಗೋಡು: ಕಿರಿದಾದ ರಸ್ತೆಯಲ್ಲಿ ಬೆಳೆದಿದ್ದ ಪೊದೆ ಹಾಗೂ ರಸ್ತೆಬದಿಯ ತಗ್ಗು-ಗುಂಡಿ ತಪ್ಪಿಸಲು ಹೋಗಿ ಶಾಲಾ ಬಸ್ಯೊಂದು ಚಾಲಕನ ನಿಯಂತ್ರಣ ತಪ್ಪಿ ಕಂದಕಕ್ಕೆ ಉರುಳಿದ ಘಟನೆ ನೆಲ್ಲಿಕ್ಕುನ್ನು ಪ್ರದೇಶದಲ್ಲಿ ನಡೆದಿದೆ. ಬಸ್ನಲ್ಲಿದ್ದ 20ಕ್ಕೂ ಹೆಚ್ಚು ಎಲ್ಕೆಜಿ ಹಾಗೂ ಯುಕೆಜಿ ವಿದ್ಯಾರ್ಥಿಗಳು ಅದೃಷ್ಟವಶಾತ್ ಯಾವುದೇ ಗಾಯಗಳಿಲ್ಲದೆ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.
ಮಾಜಿ ಶಾಸಕ ಎನ್.ಎ. ನೆಲ್ಲಿಕ್ಕುನ್ನು ಅವರ ನಿವಾಸಕ್ಕೆ ಸಮೀಪವಿರುವ 'ಬಂಕಾರಕುನ್ನು-ಕುದೂರು' ರಸ್ತೆಯಲ್ಲಿ ಗುರುವಾರ ಬೆಳಿಗ್ಗೆ ಸುಮಾರು 9.30ರ ವೇಳೆಗೆ ಈ ಘಟನೆ ಸಂಭವಿಸಿದೆ.
ಘಟನೆಯ ವಿವರ:
ಅಪಘಾತಕ್ಕೀಡಾದ ಬಸ್ ನೆಲ್ಲಿಕ್ಕುನ್ನುವಿನಲ್ಲಿರುವ 'ಅನ್ವರುಲ್ ಉಲೂಮ್' ಅನುದಾನಿತ ಹಿರಿಯ ಪ್ರಾಥಮಿಕ ಶಾಲೆಗೆ ಸೇರಿದ ಸಂಸ್ಥೆಯದ್ದಾಗಿದೆ. ಘಟನೆಯ ಸಮಯದಲ್ಲಿ ತಂಗಳ್ ಉಪ್ಪಪ್ಪ ಆಂಗ್ಲ ಮಾಧ್ಯಮ ಶಾಲೆಯ ಪುಟಾಣಿ ಮಕ್ಕಳು ಈ ಬಸ್ನಲ್ಲಿ ಪ್ರಯಾಣಿಸುತ್ತಿದ್ದರು.
ಅಪಘಾತ ಸಂಭವಿಸಿದ ಬಂಕಾರಕುನ್ನು-ಕುದೂರು ರಸ್ತೆಯು ಕೇವಲ 2.5 ಮೀಟರ್ ಅಗಲವಿದ್ದು, ಕಡಿದಾದ ಇಳಿಜಾರು ಹಾಗೂ ಅಪಾಯಕಾರಿ ತಿರುವುಗಳಿಂದ ಕೂಡಿದೆ. ರಸ್ತೆಬದಿಯಲ್ಲಿ ವಿಪರೀತ ಪೊದೆಗಳು ಬೆಳೆದಿದ್ದರಿಂದ ಚಾಲಕ ಬಸ್ಸನ್ನು ರಸ್ತೆಯ ಅಂಚಿಗೆ ತೆಗೆದುಕೊಂಡಾಗ, ಬಸ್ ಜಾರಿ ಪಕ್ಕದ ಕಂದಕಕ್ಕೆ ಸಾಗಿದೆ.
ರಕ್ಷಣೆಗೆ ಧಾವಿಸಿದ ಸ್ಥಳೀಯರು:
ಬಸ್ ಕಂದಕಕ್ಕೆ ಜಾರುತ್ತಿದ್ದಂತೆ ಶಾಲಾ ಮಕ್ಕಳು ಭಯದಿಂದ ಚೀರಾಡಲಾರಂಭಿಸಿದ್ದಾರೆ. ತಕ್ಷಣವೇ ಸೌಂಡ್ ಕೇಳಿ ಸ್ಥಳಕ್ಕೆ ಓಡಿಬಂದ ಸ್ಥಳೀಯ ನಿವಾಸಿಗಳು, ಸಮಯಪ್ರಜ್ಞೆ ಮೆರೆದು ಬಸ್ನಲ್ಲಿದ್ದ ಎಲ್ಲಾ ಮಕ್ಕಳನ್ನು ತಕ್ಷಣವೇ ಸುರಕ್ಷಿತವಾಗಿ ಹೊರತೆಗೆದಿದ್ದಾರೆ. ಪ್ರಕೃತಿ ಕೃಪೆ ಹಾಗೂ ಸ್ಥಳೀಯರ ತಕ್ಷಣದ ಕಾರ್ಯಾಚರಣೆಯಿಂದ ಅನಾಹುತ ತಪ್ಪಿದಂತಾಗಿದೆ.
ಸಾರ್ವಜನಿಕರ ಆಕ್ರೋಶ, ಸ್ಥಳದಲ್ಲಿ ಪ್ರತಿಭಟನೆ:
ಅಪಘಾತದ ವಿಷಯ ತಿಳಿಯುತ್ತಿದ್ದಂತೆ ಆಕ್ರೋಶಗೊಂಡ ಸ್ಥಳೀಯ ನಿವಾಸಿಗಳು ರಸ್ತೆ ತಡೆದು ಪ್ರತಿಭಟನೆ ನಡೆಸಿದರು. "ಈ ರಸ್ತೆಯು ತೀರಾ ಕಿರಿದಾಗಿದ್ದು, ಕಳಪೆ ಕಾಮಗಾರಿಯಿಂದ ತಗ್ಗು-ಗುಂಡಿಗಳು ಬಿದ್ದಿವೆ. ಪ್ರತಿದಿನ ನೂರಾರು ಶಾಲಾ ಮಕ್ಕಳು ಹಾಗೂ ವಾಹನಗಳು ಸಂಚರಿಸುವ ಈ ಅಪಾಯಕಾರಿ ರಸ್ತೆಯನ್ನು ತಕ್ಷಣವೇ ಅಗಲಗೊಳಿಸಿ, ದುರಸ್ತಿ ಮಾಡಬೇಕು ಮತ್ತು ರಸ್ತೆಬದಿಯ ಪೊದೆಗಳನ್ನು ತೆರವುಗೊಳಿಸಬೇಕು," ಎಂದು ಸಂಬಂಧಪಟ್ಟ ಅಧಿಕಾರಿಗಳನ್ನು ತೀವ್ರವಾಗಿ ಒತ್ತಾಯಿಸಿದ್ದಾರೆ.
