ಮುಂಬೈ: ದುಬಾರಿ ಐಫೋನ್ ಖರೀದಿಯ ಕ್ರೇಜ್ ಹಾಗೂ ಅದರ ಇಎಂಐ ಪಾವತಿಯ ವಿಚಾರವಾಗಿ ಬೆಳೆದ ಕುಟುಂಬ ಜಗಳವೊಂದು ಅತಿ ದೊಡ್ಡ ದುರಂತದಲ್ಲಿ ಅಂತ್ಯವಾಗಿದೆ. ಮಗನ ಹಠ ಹಾಗೂ ಅತಿಯಾದ ಆಕ್ರೋಶಕ್ಕೆ ಹೆತ್ತವರೂ ಪ್ರಾಣ ಕಳೆದುಕೊಂಡ ಭೀಕರ ಘಟನೆ ಮಹಾರಾಷ್ಟ್ರದಲ್ಲಿ ನಡೆದಿದೆ.
ಘಟನೆಯ ವಿವರ:
18 ವರ್ಷದ ಕುನಾಲ್ ಇತ್ತೀಚೆಗೆ ತನ್ನ ಆಸೆಯಂತೆ ಐಫೋನ್ ಖರೀದಿಸಿದ್ದ. ಆದರೆ ಅದರ ಇಎಂಐ (ಮಾಸಿಕ ಕಂತು) ಪಾವತಿಸಲು ಹಣವಿಲ್ಲದೆ, ತಂದೆ ಮುರುಳೀಧರ್ ಅವರ ಬಳಿ ಹಣ ನೀಡುವಂತೆ ಪಟ್ಟು ಹಿಡಿದಿದ್ದಾನೆ. ಈ ವಿಚಾರವಾಗಿ ತಂದೆ ಮತ್ತು ಮಗನ ನಡುವೆ ತೀವ್ರ ಮಾತಿನ ಚಕಮಕಿ ನಡೆದಿದೆ. ಜಗಳ ವಿಕೋಪಕ್ಕೆ ತಿರುಗಿ, ಕೋಪಗೊಂಡ ಕುನಾಲ್ ಮನೆಯಿಂದ ಹೊರಬಿದ್ದು ಹತ್ತಿರದ ಬೆಟ್ಟದ ತುದಿಗೆ ತೆರಳಿ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಕೆ ಹಾಕಿದ್ದಾನೆ.
ರಕ್ಷಿಸಲು ಹೋದ ಹೆತ್ತವರ ದುರಂತ:
ವಿಷಯ ತಿಳಿದು ಸ್ಥಳಕ್ಕೆ ಧಾವಿಸಿದ ಹೆತ್ತವರು ಸುಮಾರು ಮೂರು ಗಂಟೆಗಳ ಕಾಲ ಮಗನ ಮನವೊಲಿಸಲು ಹರಸಾಹಸ ಪಟ್ಟಿದ್ದಾರೆ. ಆದರೆ ಮಗ ಯಾವುದಕ್ಕೂ ಒಪ್ಪದಿದ್ದಾಗ, ಆತನನ್ನು ಹಿಡಿದು ರಕ್ಷಿಸಲು ತಂದೆ ಮುರುಳೀಧರ್ ಮುಂದೆ ಹೋಗಿದ್ದಾರೆ. ಈ ವೇಳೆ ಆಕಸ್ಮಿಕವಾಗಿ ಕಾಲಿನ ಸಮತೋಲನ ತಪ್ಪಿ ಕುನಾಲ್ನೊಂದಿಗೆ ತಂದೆಯೂ ಪ್ರಪಾತಕ್ಕೆ ಬಿದ್ದಿದ್ದಾರೆ. ಕಣ್ಣೆದುರೇ ಗಂಡ ಮತ್ತು ಮಗ ಪ್ರಪಾತಕ್ಕೆ ಬೀಳುವುದನ್ನು ಕಂಡು ಆಘಾತಕ್ಕೊಳಗಾದ ತಾಯಿ ಕೂಡ ಗಾಬರಿಯಲ್ಲಿ ಕಾಲು ಜಾರಿ ಕೆಳಗೆ ಬಿದ್ದಿದ್ದಾರೆ.
ಪರಿಣಾಮವಾಗಿ ಒಂದೇ ಕುಟುಂಬದ ಮೂವರೂ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಮಾಹಿತಿ ತಿಳಿದ ತಕ್ಷಣ ಸ್ಥಳಕ್ಕೆ ಬಂದ ಪೊಲೀಸರು ಮೃತದೇಹಗಳನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗೆ ರವಾನಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ.
