ಕಲ್ಮಂಜ (ದಕ್ಷಿಣ ಕನ್ನಡ): ಇತ್ತೀಚೆಗೆ ಸುರಿದ ಭಾರಿ ಮಳೆಗೆ ಮನೆ ಕಳೆದುಕೊಂಡು ಕಂಗಾಲಾಗಿದ್ದ ಕಲ್ಮಂಜ ಗ್ರಾಮದ ದಲಿತ ಸಮುದಾಯದ ವೃದ್ಧೆ ಚೋಮು ನಲಿಕೆ ಅವರಿಗೆ ಬೆಳ್ತಂಗಡಿ ಶಾಸಕ ಹರೀಶ್ ಪೂಂಜಾ ಮಗನಂತೆ ನಿಂತು ಆಸರೆಯಾಗಿದ್ದಾರೆ. ಮಳೆಯಿಂದ ಜಖಂಗೊಂಡಿದ್ದ ವೃದ್ಧೆಯ ಮನೆಯನ್ನು ಕೇವಲ ಒಂದೇ ದಿನದಲ್ಲಿ ಸಂಪೂರ್ಣ ದುರಸ್ತಿಗೊಳಿಸಿ, ವಾಸಯೋಗ್ಯ ಹೊಸ ನಿವಾಸವನ್ನಾಗಿ ಪರಿವರ್ತಿಸಿ ಮಾನವೀಯತೆ ಮೆರೆದಿದ್ದಾರೆ.
ಘಟನೆಯ ಹಿನ್ನೆಲೆ:
ಕಳೆದ ಕೆಲವು ದಿನಗಳ ಹಿಂದೆ ಸುರಿದ ಧಾರಾಕಾರ ಮಳೆಗೆ ಕಲ್ಮಂಜ ಗ್ರಾಮದ ಚೋಮು ಅಜ್ಜಿಯವರ ಮನೆಯ ಹಿಂಭಾಗದ ಗೋಡೆ ಕುಸಿದುಬಿದ್ದಿತ್ತು. ಜೊತೆಗೆ ಮನೆಯ ಮೇಲ್ಛಾವಣಿಯೂ ಸಂಪೂರ್ಣವಾಗಿ ಹಾನಿಗೊಳಗಾಗಿತ್ತು. ಕ್ಷೇತ್ರದ ಮಳೆ ಹಾನಿ ಪ್ರದೇಶಗಳ ಪರಿಶೀಲನೆ ನಡೆಸುತ್ತಿದ್ದ ಶಾಸಕ ಹರೀಶ್ ಪೂಂಜಾ ಅವರು ಆಗಸ್ಟ್ 3ರಂದು ಚೋಮು ನಲಿಕೆ ಅವರ ಮನೆಗೆ ಭೇಟಿ ನೀಡಿದ್ದರು.
ಅಜ್ಜಿಯ ಕಷ್ಟದ ಪರಿಸ್ಥಿತಿಯನ್ನು ಕಂಡು ಭಾವುಕರಾದ ಶಾಸಕರು, ತಕ್ಷಣವೇ ಸ್ಪಂದಿಸಿ "ಈ ಮನೆಯ ಸಂಪೂರ್ಣ ಪುನರ್ನಿರ್ಮಾಣ ವೆಚ್ಚವನ್ನು ನಾನೇ ಭರಿಸುತ್ತೇನೆ" ಎಂದು ಭರವಸೆ ನೀಡಿದ್ದರು.
ಶ್ರಮದಾನದ ಮೂಲಕ ಒಂದೇ ದಿನದಲ್ಲಿ ಮನೆ ಸಿದ್ಧ!
ಶಾಸಕರ ಕರೆಯ ಮೇರೆಗೆ ಕಲ್ಮಂಜ ಬಿಜೆಪಿ ಗ್ರಾಮ ಸಮಿತಿಯ ಯುವಕರು ಹಾಗೂ ಸ್ಥಳೀಯರು ಆಗಸ್ಟ್ 9ರಂದು ಶ್ರಮದಾನ ಕೈಗೊಂಡರು. ಕೇವಲ ಒಂದೇ ದಿನದಲ್ಲಿ ಐರನ್ ರಾಡ್ಗಳು ಹಾಗೂ ಬಾಳಿಕೆ ಬರುವ ಶೀಟ್ಗಳನ್ನು ಬಳಸಿ ಹೊಸ ಛಾವಣಿ ನಿರ್ಮಿಸಲಾಯಿತು.
ಜೆಸಿಬಿ ಬಳಸಿ ಮನೆಯ ಸುತ್ತಮುತ್ತಲ ಪ್ರದೇಶವನ್ನು ಸ್ವಚ್ಛಗೊಳಿಸಿ, ಇಡೀ ಮನೆಗೆ ಪೇಂಟಿಂಗ್ ಮಾಡಿ, ಮನೆಯ ಒಳಗಡೆಯೂ ಶುಚಿಗೊಳಿಸಿ ಸುಸಜ್ಜಿತ ನಿವಾಸವನ್ನಾಗಿ ಪರಿವರ್ತಿಸಲಾಯಿತು.
ಜೀವ ಇರುವವರೆಗೆ ಶಾಸಕರನ್ನು ಮರೆಯಲ್ಲ: ಚೋಮು ಅಜ್ಜಿ ಕಣ್ಣೀರು
ಶಾಸಕರ ಮಾನವೀಯ ಕಾರ್ಯಕ್ಕೆ ಕಣ್ಣೀರಿಟ್ಟ ಚೋಮು ಅಜ್ಜಿ, "ಸಣ್ಣ ಸಹಾಯಕ್ಕೂ ಕಷ್ಟವಿರುವ ಈ ಕಾಲದಲ್ಲಿ, ನನಗೆ ಮಗನ ಸ್ಥಾನದಲ್ಲಿ ನಿಂತು ಶಾಸಕ ಹರೀಶ್ ಪೂಂಜಾ ಅವರು ಹೊಸ ಮನೆ ಕಟ್ಟಿಸಿಕೊಟ್ಟಿದ್ದಾರೆ. ನನ್ನ ಜೀವ ಇರುವವರೆಗೂ ಈ ಉಪಕಾರವನ್ನು ನಾನು ಮರೆಯುವುದಿಲ್ಲ" ಎಂದು ಗದ್ಗದಿತರಾಗಿ ಧನ್ಯವಾದ ತಿಳಿಸಿದರು.
ಶ್ರಮದಾನದಲ್ಲಿ ಭಾಗವಹಿಸಿದವರು:
ಈ ಮಹತ್ಕಾರ್ಯ ಮತ್ತು ಶ್ರಮದಾನದಲ್ಲಿ ಸಮಾಜ ಸೇವಕ ಬಾಲಕೃಷ್ಣ ನೈಮಿಷ ಮಾಣಿಂಜೆ, ಸ್ಥಳೀಯ ವರ್ತಕ ನೋಣಯ್ಯ ಗೌಡ, ಮುಂಡಾಜೆ ಬಿಜೆಪಿ ನಾಯಕ ಗಣೇಶ್ ಬಂಗೇರ, ಕೃಷಿಕ ಶ್ರೀನಿವಾಸ್ ರಾವ್, ಕಲ್ಮಂಜ ಗ್ರಾಮ ಪಂಚಾಯತ್ ಮಾಜಿ ಸದಸ್ಯ ಪ್ರವೀಣ್ ಕರಿಯನೆಲ, ಬೂತ್ ಅಧ್ಯಕ್ಷ ಅನಿಲ್ ಕುಮಾರ್ ಮದಿಮಲ್ ಕಟ್ಟೆ, ಕಾರ್ಯದರ್ಶಿ ಗುರುರಾಜ್ ಕರಿಯನೆಲ ಸೇರಿದಂತೆ ಸಂದೀಪ್ ಪರಾರಿಮಜಲು, ಧನಂಜಯ, ಮೋಹನ್, ಜಗದೀಶ್, ಪುರಕ್ಷಿತ್, ಭರತೇಶ್, ದೀಕ್ಷಿತ್, ಹರೀಶ್, ಶೃತೇಶ್, ಜನಿತ್, ಮುರಳಿ, ಸಾಂತಪ್ಪ ಹಾಗೂ ಸ್ಥಳೀಯ ಗ್ರಾಮಸ್ಥರು ಸಾಥ್ ನೀಡಿದರು. ಕಲ್ಮಂಜ ಗ್ರಾಮ ಪಂಚಾಯತ್ ಸಹಕಾರವೂ ಈ ಕಾರ್ಯಕ್ಕೆ ದೊರಕಿತ್ತು.
