ಪುತ್ತೂರು:ಐತಿಹಾಸಿಕ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಸಮಗ್ರ ಅಭಿವೃದ್ಧಿ ಮತ್ತು ಜೀರ್ಣೋದ್ಧಾರ ಕಾರ್ಯಗಳು ಜೀರ್ಣೋದ್ಧಾರ ಸಮಿತಿ ಅಧ್ಯಕ್ಷ ಹಾಗೂ ಶಾಸಕ ಅಶೋಕ್ ಕುಮಾರ್ ರೈ ಅವರ ನೇತೃತ್ವದಲ್ಲಿ, ಸಮಸ್ತ ಭಕ್ತಾದಿಗಳ ಪೂರ್ಣ ಸಹಕಾರದೊಂದಿಗೆ ಸುಸೂತ್ರವಾಗಿ ಸಾಗುತ್ತಿವೆ ಎಂದು ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಈಶ್ವರ ಭಟ್ ಪಂಜಿಗುಡ್ಡೆ ತಿಳಿಸಿದ್ದಾರೆ.
ಕ್ಷೇತ್ರದಲ್ಲಿ ನಡೆದ ಪ್ರಮುಖ ಧಾರ್ಮಿಕ ಹಾಗೂ ಅಭಿವೃದ್ಧಿ ಸೇವೆಗಳು:
ದೇವಸ್ಥಾನದಲ್ಲಿ ಪ್ರಸ್ತುತ ಸಾಲು ಸಾಲು ಅಭಿವೃದ್ಧಿ ಮತ್ತು ಧಾರ್ಮಿಕ ಕಾಂಕರ್ಯಗಳು ನೆರವೇರುತ್ತಿದ್ದು, ಪ್ರಮುಖವಾಗಿ:
- ಸ್ವರ್ಣ ಕವಚ ಸೇವೆ: ಈವರೆಗೆ ಭಕ್ತರಿಂದ 300 ಗ್ರಾಂ ನಷ್ಟು ಬಂಗಾರ ಸಮರ್ಪಣೆಯಾಗಿದೆ.
- ಧಾರ್ಮಿಕ ಸೇವೆಗಳು: ದೊಡ್ಡ ಮಟ್ಟದ ನಗದು ದೇಣಿಗೆ, ತುಪ್ಪ ಸೇವೆ, ಎಳ್ಳೆಣ್ಣೆ ಅಭಿಷೇಕ ಹಾಗೂ ಸುಮಾರು ₹40 ಲಕ್ಷ ಮೌಲ್ಯದ ಅಕ್ಕಿ ಸೇವೆ ನೆರವೇರಿದೆ.
- ವಾಸ್ತು ರಚನೆ: ವಿವಿಧ ಭಾಗಗಳಲ್ಲಿ ಸುಂದರ ಶಿಲಾಮಯ ಕಟ್ಟೆಗಳ ನಿರ್ಮಾಣ ಪೂರ್ಣಗೊಂಡಿದೆ.
- ಸುಸಜ್ಜಿತ ಅನ್ನಪ್ರಸಾದ: ಭಕ್ತಾದಿಗಳಿಗೆ ಅನ್ನಪ್ರಸಾದ ವಿತರಣೆ ಅಚ್ಚುಕಟ್ಟಾಗಿ ನಡೆಯುತ್ತಿದ್ದು, ಸೌದೆ ಹಾಗೂ ಗ್ಯಾಸ್ ವೆಚ್ಚವನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ಆಧುನಿಕ 'ಸ್ಟೀಮ್ ಸಿಸ್ಟಮ್' ಅಳವಡಿಸಲಾಗಿದೆ.
ರಥಬೀದಿ ಭದ್ರತೆ ಹಾಗೂ ಆವರಣ ಗೋಡೆ ನಿರ್ಮಾಣ:
ಕ್ಷೇತ್ರದ ರಥಬೀದಿಯಲ್ಲಿ ಅಕ್ರಮ ವಾಹನ ನಿಲುಗಡೆ, ತ್ಯಾಜ್ಯ ಎಸೆಯುವುದು, ಗೋ ಕಳವು ಯತ್ನ ಮತ್ತು ಆಂಬುಲೆನ್ಸ್ ಮೂಲಕ ಶವ ಸಾಗಾಟದಂತಹ ಅಹಿತಕರ ಘಟನೆಗಳಿಗೆ ತಡೆ ಹಾಕಬೇಕೆಂದು ದೇವಸ್ಥಾನ ಸಂರಕ್ಷಣಾ ಸಮಿತಿ ಮನವಿ ಮಾಡಿತ್ತು.
ಈ ಹಿನ್ನೆಲೆಯಲ್ಲಿ ಭಕ್ತರೊಂದಿಗೆ ಸಭೆ ನಡೆಸಿ, ಕ್ಷೇತ್ರದ ಪವಿತ್ರತೆ ಮತ್ತು ಸುರಕ್ಷತೆಯ ಹಿತದೃಷ್ಟಿಯಿಂದ:
- ರಸ್ತೆ ಸುಧಾರಣೆ ಮಾಡಲಾಗಿದೆ.
- ಮುಂದಿನ ದಿನಗಳಲ್ಲಿ ದೇವಸ್ಥಾನದ ಸುತ್ತ ಆವರಣ ಗೋಡೆ (ಕಾಂಪೌಂಡ್) ಹಾಗೂ ಮುಖ್ಯ ಗೇಟ್ ಅಳವಡಿಸಲು ನಿರ್ಧರಿಸಲಾಗಿದೆ.
ಅಪಪ್ರಚಾರಕ್ಕೆ ಕಿವಿಗೊಡಬೇಡಿ – ದಾಖಲೆ ಪರಿಶೀಲನೆಗೆ ಮುಕ್ತ ಅವಕಾಶ:
ದೇವಸ್ಥಾನದ ಹತ್ತಿರದ ತೋಡಿಗೆ ಸುಮಾರು ₹4 ಕೋಟಿ ವೆಚ್ಚದಲ್ಲಿ ತಡೆಗೋಡೆ ನಿರ್ಮಿಸಲಾಗಿದ್ದು, ಇದರಿಂದ ದೇವಸ್ಥಾನಕ್ಕೆ ಸೇರಿದ ಜಾಗ ಸಂರಕ್ಷಣೆಗೊಂಡಿದೆ.
"ಪ್ರಸ್ತುತ ನಡೆಯುತ್ತಿರುವ ಅಭಿವೃದ್ಧಿ ಕಾರ್ಯಗಳ ವಿರುದ್ಧ ಕೆಲವರು ಆಧಾರರಹಿತ ಆರೋಪಗಳನ್ನು ಮಾಡುತ್ತಿದ್ದಾರೆ. ಇದರ ಹಿಂದೆ ಭೂ ಮಾಫಿಯಾದ ಹಿತಾಸಕ್ತಿ ಅಡಗಿದೆಯೇ ಎಂಬ ಅನುಮಾನ ಮೂಡುತ್ತಿದೆ. ದೇವಳದ ಎಲ್ಲಾ ಕಾರ್ಯಗಳು ಸಂಪೂರ್ಣ ಕಾನೂನು ಮತ್ತು ನಿಯಮಾವಳಿಗಳತೆಯೇ ನಡೆಯುತ್ತಿವೆ. ಯಾರಿಗಾದರೂ ಸಂಶಯವಿದ್ದರೆ 'ಮಾಹಿತಿ ಹಕ್ಕು ಕಾಯ್ದೆ' (RTI) ಅಡಿಯಲ್ಲಿ ದಾಖಲೆಗಳನ್ನು ಪಡೆದು ಪರಿಶೀಲಿಸಬಹುದು. ಭಕ್ತಾದಿಗಳು ಯಾವುದೇ ರೀತಿಯ ದುಷ್ಪ್ರಚಾರಗಳಿಗೆ ಕಿವಿಗೊಡಬಾರದು."
– ಈಶ್ವರ ಭಟ್ ಪಂಜಿಗುಡ್ಡೆ (ಅಧ್ಯಕ್ಷರು, ವ್ಯವಸ್ಥಾಪನಾ ಸಮಿತಿ)
ಮುಂದಿನ ಯೋಜನೆ: ಬ್ರಹ್ಮಕಲಶೋತ್ಸವದ ಸಿದ್ಧತೆ
ಆಗಸ್ಟ್ 15ರ ನಂತರ ನೂತನ ಸುಸಜ್ಜಿತ ಸಭಾಭವನದ ನಿರ್ಮಾಣಕ್ಕೆ ಟೆಂಡರ್ ಪ್ರಕ್ರಿಯೆ ನಡೆಸಿ, ಶಿಲಾನ್ಯಾಸ ನೆರವೇರಿಸಲಾಗುವುದು. ಹಂತ ಹಂತವಾಗಿ ಎಲ್ಲಾ ಅಭಿವೃದ್ಧಿ ಕಾಮಗಾರಿಗಳನ್ನು ಪೂರ್ಣಗೊಳಿಸಿ, ವಿಜ್ರಂಭಣೆಯ ಬ್ರಹ್ಮಕಲಶೋತ್ಸವಕ್ಕೆ ಕ್ಷೇತ್ರವನ್ನು ಸಜ್ಜುಗೊಳಿಸಲಾಗುವುದು ಎಂದು ಅವರು ಮಾಹಿತಿ ನೀಡಿದ್ದಾರೆ.
