ಕಡಬ:ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಮತ್ತೊಂದು ಅನೈತಿಕ ಪೊಲೀಸ್ಗಿರಿ ಆರೋಪ ಕೇಳಿಬಂದಿದ್ದು, ಯುವತಿ ಹಾಗೂ ಆಕೆಯ ಕುಟುಂಬದವರ ಮೇಲೆ ಹಲ್ಲೆ ನಡೆಸಿದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಕಡಬ ತಾಲೂಕಿನ ಕೋಲ್ಪೆ ಗ್ರಾಮದಲ್ಲಿ ಆಗಸ್ಟ್ 12ರಂದು ಈ ಘಟನೆ ಸಂಭವಿಸಿದ್ದು, ಪ್ರಸ್ತುತ ಸಂತ್ರಸ್ತ ಯುವತಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಕಾರು ತಡೆದು ಹಲ್ಲೆ ನಡೆಸಿದ ಪುಂಡರು:
ಕೋಲ್ಪೆ ನಿವಾಸಿ ಫಾಯಿಝಾ (18) ಎಂಬ ಯುವತಿ ಮೆಲ್ಕಾರ್ನಲ್ಲಿ ಕೆಲಸ ಮುಗಿಸಿ, ಆ ಬಟ್ಟೆ ಅಂಗಡಿಯ ಮಾಲೀಕ ಝಾಹಿರ್ ಅವರ ಸ್ನೇಹಿತ ಸಿಪ್ಪಾನ್ ಅವರ ಕಾರಿನಲ್ಲಿ ಮನೆಗೆ ಮರಳುತ್ತಿದ್ದರು. ಕಾರಿನಲ್ಲಿ ಝಾಹಿರ್ ಅವರ ತಾಯಿ ಸಫಿಯಾ ಕೂಡ ಇದ್ದರು. ರಾತ್ರಿ ಸುಮಾರು 11 ಗಂಟೆಯ ವೇಳೆಗೆ ಕೋಲ್ಪೆ ತಲುಪಿದಾಗ, 5 ರಿಂದ 6 ಜನರಿದ್ದ ಪುಂಡರ ಗುಂಪೊಂದು ಕಾರು ಹಾಗೂ ಜೊತೆಯಲ್ಲಿದ್ದ ಸ್ಕೂಟರ್ ಅನ್ನು ತಡೆದು ಗಲಾಟೆ ಆರಂಭಿಸಿದೆ.
ಈ ವೇಳೆ ಯುವತಿಯ ಮೇಲೆ ಮನಬಂದಂತೆ ಹಲ್ಲೆ ನಡೆಸಿ, ಕಪಾಳಕ್ಕೆ ಹೊಡೆದು ಜೀವ ಬೆದರಿಕೆ ಹಾಕಲಾಗಿದೆ. ಗಲಾಟೆ ಬಿಡಿಸಲು ಬಂದ ಜಮಾಲ್ ಎಂಬುವವರ ಮೇಲೆಯೂ ಹಲ್ಲೆ ನಡೆಸಿ ತಳ್ಳಾಡಲಾಗಿದೆ ಎಂದು ಸಂತ್ರಸ್ತೆ ಆರೋಪಿಸಿದ್ದಾರೆ.
ತಂಗಿಯ ಮೇಲೆಯೂ ಹಲ್ಲೆ:
ಅಷ್ಟೇ ಅಲ್ಲದೆ, ಗಲಾಟೆಯ ಸದ್ದಿಗೆ ಸ್ಥಳಕ್ಕೆ ಧಾವಿಸಿದ ಯುವತಿಯ ತಂಗಿ ಫಾಸಿಲಾ, ಪ್ರಜ್ಞೆ ತಪ್ಪಿ ಬಿದ್ದಿದ್ದ ಅಕ್ಕನನ್ನು ಎತ್ತಲು ಯತ್ನಿಸಿದಾಗ ಆಕೆಯ ಮೇಲೆಯೂ ಸಿದ್ದೀಕ್ ಎಂಬಾತ ಕಪಾಳಕ್ಕೆ ಹೊಡೆದು ತಳ್ಳಿದ್ದಾನೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.
ಆಸ್ಪತ್ರೆಯಿಂದಲೇ ವಿಡಿಯೋ ವೈರಲ್, 9 ಮಂದಿ ವಿರುದ್ಧ ಪ್ರಕರಣ:
ಘಟನೆಯಲ್ಲಿ ಗಾಯಗೊಂಡ ಯುವತಿ ಆಸ್ಪತ್ರೆಗೆ ದಾಖಲಾಗಿದ್ದು, ಆಸ್ಪತ್ರೆಯ ಮಂಚದ ಮೇಲಿಂದಲೇ ವಿಡಿಯೋ ಮಾಡಿ ತಮಗಾದ ಅನ್ಯಾಯವನ್ನು ಹಂಚಿಕೊಂಡಿದ್ದಾರೆ.
ಸಂತ್ರಸ್ತೆ ನೀಡಿದ ದೂರಿನನ್ವಯ ಉಪ್ಪಿನಂಗಡಿ ಪೊಲೀಸ್ ಠಾಣೆಯಲ್ಲಿ BNS ಕಾಯ್ದೆಯ ವಿವಿಧ ಸೆಕ್ಷನ್ಗಳಡಿ (115(2), 126(2), 189(2), 190, 191(2), 351(2), 352) ಪ್ರಕರಣ ದಾಖಲಾಗಿದೆ.
ಆರೋಪಿಗಳ ವಿವರ:
ಜಾಬೀರ್, ಸಿದ್ದೀಕ್, ಉನೈಸ್, ರಂಶಿಕ್, ಸಂಶುದ್ದೀನ್, ಜಾಫರ್, ಆಶಿತ್, ಆಚೂರು ಅಲಿಯಾಸ್ ಅಶ್ರಫ್ ಹಾಗೂ ಅಶ್ರಫ್ ಕೋಲ್ಪೆ ಸೇರಿದಂತೆ ಒಟ್ಟು 9 ಜನರ ವಿರುದ್ಧ ಎಫ್ಐಆರ್ ದಾಖಲಾಗಿದ್ದು, ಪೊಲೀಸರು ಮುಂದಿನ ಕಾನೂನು ಕ್ರಮ ಹಾಗೂ ತನಿಖೆ ಕೈಗೊಂಡಿದ್ದಾರೆ.
