ನವದೆಹಲಿ: ದೇಶದ ಪ್ರಮುಖ ಮಸಾಲೆ ಉತ್ಪಾದನಾ ಸಂಸ್ಥೆಗಳಾದ 'ಎವರೆಸ್ಟ್ ಫುಡ್ ಪ್ರಾಡಕ್ಟ್ಸ್' ಹಾಗೂ 'ಲಾಲ್ಜಿ ಗೋಧು & ಕಂಪನಿ'ಗೆ ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರ (FSSAI) ಬೃಹತ್ ಆಘಾತ ನೀಡಿದೆ. ಗುಣಮಟ್ಟದ ಪರೀಕ್ಷೆಯಲ್ಲಿ ನಿಯಮ ಉಲ್ಲಂಘನೆ ಕಂಡುಬಂದ ಹಿನ್ನೆಲೆಯಲ್ಲಿ, ಈ ಸಂಸ್ಥೆಗಳ ಇಂಗು ಪುಡಿ ಮಾರಾಟವನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ನಿಷೇಧಿಸಿ ಆದೇಶಿಸಿದೆ.
ಆಹಾರ ಪ್ರಯೋಗಾಲಯದ ತಪಾಸಣೆಯಲ್ಲಿ ಲೋಪ ಪತ್ತೆ
FSSAI ನಡೆಸಿದ ಪ್ರಾಥಮಿಕ ಆಹಾರ ಪ್ರಯೋಗಾಲಯ ಪರಿಶೀಲನೆಯಲ್ಲಿ ಇಂಗು ಪುಡಿಯ ಮಾದರಿಗಳು ಕಳಪೆ ಗುಣಮಟ್ಟದಿಂದ ಕೂಡಿರುವುದು ಹಾಗೂ ತಪ್ಪಾದ ಬ್ರಾಂಡಿಂಗ್ ಹೊಂದಿರುವುದು ದೃಢಪಟ್ಟಿದೆ. ಈ ಉತ್ಪನ್ನಗಳು ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ (FSS) ನಿಯಮಗಳು, 2011ರ ನಿಬಂಧನೆಗಳನ್ನು ಉಲ್ಲಂಘಿಸಿವೆ ಎಂದು ಪ್ರಾಧಿಕಾರ ಸ್ಪಷ್ಟಪಡಿಸಿದೆ.
ನಿಯಮಾವಳಿ ಉಲ್ಲಂಘನೆಯ ವಿವರಗಳು:
ಇಂಗು ಪುಡಿ: ನಿಯಮಗಳ ಪ್ರಕಾರ ಇರಬೇಕಾದ ಕನಿಷ್ಠ ಶೇ. 5ರಷ್ಟು ಆಲ್ಕೋಹಾಲ್-ಕರಗುವ ಸಾರದ (Alcohol-soluble extract) ಅಂಶವು ಈ ಮಾದರಿಗಳಲ್ಲಿ ಸಂಪೂರ್ಣವಾಗಿ ಶೂನ್ಯ (0%) ಕಂಡುಬಂದಿದೆ.
ಹಳದಿ ಮಿಶ್ರಿತ ಇಂಗು: ಇದರಲ್ಲಿ ಆಲ್ಕೋಹಾಲ್-ಕರಗುವ ಸಾರದ ಪ್ರಮಾಣ ಶೇ. 3.29ರಷ್ಟು ಮಾತ್ರ ಇತ್ತು.
ಕಪ್ಪು ಮಿಶ್ರಿತ ಇಂಗು: ಈ ಮಾದರಿಯಲ್ಲಿ ಸಾರದ ಪ್ರಮಾಣ ಶೇ. 4.4ರಷ್ಟು ದಾಖಲಾಗಿದ್ದು, ನಿಗದಿತ ಮಾನದಂಡ ತಲುಪುವಲ್ಲಿ ವಿಫಲವಾಗಿದೆ.
ಮೂರು ಪ್ರಮುಖ ಮಸಾಲೆಗಳಿಗೂ ಬಿತ್ತು ಕೋಕ್
ಇಂಗು ಪುಡಿಯಷ್ಟೇ ಅಲ್ಲದೆ, ಎವರೆಸ್ಟ್ ಸಂಸ್ಥೆಯ ಗರಂ ಮಸಾಲ, ಚಿಕನ್ ಮಸಾಲ ಹಾಗೂ ಎಗ್ ಕರಿ ಮಸಾಲ ಉತ್ಪನ್ನಗಳಲ್ಲೂ ಗಂಭೀರ ಲೋಪಗಳು ಕಂಡುಬಂದಿವೆ. ಗುಣಮಟ್ಟದ ಮಾನದಂಡಗಳನ್ನು ಕಾಯ್ದುಕೊಳ್ಳದ ಕಾರಣ FSSAI ಈ ಸಂಬಂಧ ಸಂಸ್ಥೆಗೆ ಅಧಿಕೃತ ನೋಟಿಸ್ ಜಾರಿ ಮಾಡಿದೆ.
ಉತ್ಪನ್ನಗಳಲ್ಲಿ ಕಂಡುಬಂದಿರುವ ಈ ತಾಂತ್ರಿಕ ಹಾಗೂ ಗುಣಮಟ್ಟದ ನ್ಯೂನತೆಗಳನ್ನು ತಕ್ಷಣವೇ ಸರಿಪಡಿಸದಿದ್ದರೆ, ಸಂಸ್ಥೆಗಳ ವಿರುದ್ಧ ಮತ್ತಷ್ಟು ಕಠಿಣ ಕಾನೂನು ಕ್ರಮ ಜರುಗಿಸುವುದಾಗಿ FSSAI ಎಚ್ಚರಿಕೆ ನೀಡಿದೆ.
