ಉಜಿರೆ: ಇಂದಿನ ಸ್ಪರ್ಧಾತ್ಮಕ ಹಾಗೂ ಆಧುನಿಕ ಯುಗದಲ್ಲಿ ಮಹಿಳೆಯರು ಕೇವಲ ಪಠ್ಯಪುಸ್ತಕಗಳ ಓದಿಗೆ ಮಾತ್ರ ಸೀಮಿತವಾಗದೆ ಸಾಹಿತ್ಯ, ಕಲೆ ಮತ್ತು ವಿಜ್ಞಾನ ಸೇರಿದಂತೆ ಪ್ರತಿಯೊಂದು ಕ್ಷೇತ್ರದಲ್ಲೂ ತಮ್ಮದೇ ಆದ ವಿಶಿಷ್ಟ ಮುದ್ರೆ ಒತ್ತಬೇಕು ಎಂದು ಎಸ್.ಡಿ.ಎಂ ಜರ್ನಲಿಸಂ ವಿಭಾಗದ 'ನ್ಯೂಸ್ ಆಪ್' ಎಡಿಟರ್ ಮೋಕ್ಷಾ ರೈ ಅಭಿಪ್ರಾಯಪಟ್ಟರು.
ಅವರು ಎಸ್.ಡಿ.ಎಂ ಮಹಿಳಾ ಐ.ಟಿ.ಐ ಸಂಸ್ಥೆಯ ಭಿತ್ತಿಪತ್ರಿಕೆ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು.
ಕಾರ್ಯಕ್ರಮದಲ್ಲಿ ಭಿತ್ತಿಪತ್ರಿಕೆ ಬಿಡುಗಡೆಗೊಳಿಸಿ ಮಾತನಾಡಿದ ಅವರು, "ಇಲ್ಲಿನ ವಿದ್ಯಾರ್ಥಿನಿಯರು ರಚಿಸಿರುವ ಕವನಗಳು, ಲೇಖನಗಳು, ಸುಂದರ ರೇಖಾಚಿತ್ರಗಳು ಮತ್ತು ಸ್ಪೂರ್ತಿದಾಯಕ ನುಡಿಮುತ್ತುಗಳನ್ನು ಗಮನಿಸಿದರೆ ಅವರಲ್ಲಿರುವ ಅದ್ಭುತ ಪ್ರತಿಭೆ ಮತ್ತು ಸೃಜನಶೀಲತೆ ವ್ಯಕ್ತವಾಗುತ್ತದೆ. ಮಾತೃಶ್ರೀ ಹೇಮಾವತಿ ಹೆಗ್ಗಡೆಯವರ ಆಶಯದಂತೆ, ಗ್ರಾಮೀಣ ಹಾಗೂ ಬಡ ಕುಟುಂಬಗಳ ಹೆಣ್ಣುಮಕ್ಕಳ ಅಡಗಿರುವ ಪ್ರತಿಭೆಗಳು ಜಗತ್ತಿನೆದುರು ಅನಾವರಣಗೊಳ್ಳಬೇಕಿದೆ" ಎಂದರು.
ಮುಂದುವರಿದು ಮಾತನಾಡಿದ ಅವರು, "ತರಗತಿಯ ಕಲಿಕೆಯ ಜೊತೆಗೆ ಇಂತಹ ಸಾಂಸ್ಕೃತಿಕ ಹಾಗೂ ಸೃಜನಶೀಲ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಾಗ ಮಾತ್ರ ವ್ಯಕ್ತಿತ್ವ ವಿಕಸನ (Personality Development) ಸಾಧ್ಯ. ಬರವಣಿಗೆ ಎನ್ನುವುದು ಯೋಚನೆಗಳಿಗೆ ರೆಕ್ಕೆ ನೀಡುವ ಶಕ್ತಿ ಹೊಂದಿದ್ದು, ಮನಸ್ಸಿನ ಭಾವನೆಗಳನ್ನು ಸಮಾಜಕ್ಕೆ ತಲುಪಿಸಲು ಲೇಖನಿಗಿಂತ ಶ್ರೇಷ್ಠ ಆಯುಧ ಬೇರಿಲ್ಲ. ಹಗಲಿರುಳು ಶ್ರಮಿಸಿ ಭಿತ್ತಿಪತ್ರಿಕೆಯನ್ನು ಅತ್ಯಂತ ಆಕರ್ಷಕವಾಗಿ ಹೊರತಂದ ವಿದ್ಯಾರ್ಥಿ ಬಳಗ ಅಭಿನಂದನಾರ್ಹ" ಎಂದು ಶ್ಲಾಘಿಸಿದರು.
'ವನಿತೆ' ಜ್ಞಾನ ಮತ್ತು ಸೃಜನಶೀಲತೆಯ ಸಂಕೇತ:
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ಸಂಸ್ಥೆಯ ಪ್ರಾಂಶುಪಾಲ ವಿ. ಪ್ರಕಾಶ್ ಕಾಮತ್ ಮಾತನಾಡಿ, "ಈ ಭಿತ್ತಿಪತ್ರಿಕೆಗೆ 'ವನಿತೆ' ಎಂದು ನಾಮಕರಣ ಮಾಡಿರುವುದು ಅತ್ಯಂತ ಅರ್ಥಪೂರ್ಣವಾಗಿದೆ. 'ವನಿತೆ' ಎಂದರೆ ಕೇವಲ ನಾರಿಯಷ್ಟೇ ಅಲ್ಲ, ಅವಳು ಜ್ಞಾನ ಮತ್ತು ಸೃಜನಶೀಲತೆಯ ಸಂಕೇತ. ವಿದ್ಯಾರ್ಥಿನಿಯರ ಲೇಖನಿ ಹಾಗೂ ಪ್ರತಿಭೆ ಇಷ್ಟಕ್ಕೇ ಸೀಮಿತವಾಗದೆ ಮುಂದೆಯೂ ನಿರಂತರವಾಗಿ ಬೆಳಗಲಿ" ಎಂದು ಶುಭಹಾರೈಸಿದರು. ಅಲ್ಲದೆ, ಕಾರ್ಯಕ್ರಮದಶಸ್ಸಿಗೆ ಸಹಕರಿಸಿದ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸಿದರು.
ಸಂಸ್ಥೆಯ ವಿದ್ಯಾರ್ಥಿನಿ ನಿಶಾ ಕಾರ್ಯಕ್ರಮ ನಿರೂಪಿಸಿದರು. ಲಿಕಿತಾ ಸಭಿಕರನ್ನು ಸ್ವಾಗತಿಸಿದರೆ, ತೃಪ್ತಿ ವಂದನಾರ್ಪಣೆ ಮಾಡಿದರು. ಸಭಾ ಕಾರ್ಯಕ್ರಮದ ನಂತರ ವಿದ್ಯಾರ್ಥಿನಿಯರಿಂದ ವೈವಿಧ್ಯಮಯ ಸಾಂಸ್ಕೃತಿಕ ವೈಭವ ಜರುಗಿತು.
