ಬೆಂಗಳೂರು (ಸೆ. 27): ಕನ್ನಡ ಚಲನಚಿತ್ರ ರಂಗ ಹಾಗೂ ಸಂಗೀತ ಲೋಕದ ಖ್ಯಾತ ವಾದಕ, ‘ಕನ್ನಡದ ಶಿವಮಣಿ’ ಎಂದೇ ಹೆಸರುವಾಸಿಯಾಗಿದ್ದ ಡ್ರಮ್ಮರ್ ದೇವ (64) ಭಾನುವಾರ ನಿಧನರಾಗಿದ್ದಾರೆ.
ಕಳೆದ ಕೆಲವು ಸಮಯದಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು, ಗ್ಯಾಂಗ್ರಿನ್ ಸಮಸ್ಯೆಯಿಂದಾಗಿ ತಮ್ಮ ಒಂದು ಕಾಲನ್ನು ಕಳೆದುಕೊಂಡಿದ್ದರು. ಇಂದು ರಾಜರಾಜೇಶ್ವರಿ ನಗರದಲ್ಲಿರುವ (ಆರ್.ಆರ್. ನಗರ) ತಮ್ಮ ಸ್ವಗೃಹದಲ್ಲಿ ಕೊನೆಯುಸಿರೆಳೆದರು.
ಡ್ರಮ್ ಒರೆಸುವ ಕೆಲಸದಿಂದ ಶ್ರೇಷ್ಠ ಹಂತದವರೆಗೆ...
ದೇವ ಅವರ ಜೀವನ ಪಯಣ ಪ್ರತಿಯೊಬ್ಬರಿಗೂ ಪ್ರೇರಣಾದಾಯಿಯಾದದ್ದು. ಆರಂಭಿಕ ದಿನಗಳಲ್ಲಿ ವಾದ್ಯಗಳನ್ನು ಒರೆಸುವ ಕೆಲಸ ಮಾಡುತ್ತಿದ್ದ ಅವರು, ತಮ್ಮ ಅಪಾರ ಶ್ರದ್ಧೆ ಹಾಗೂ ನಿರಂತರ ಕಠಿಣ ಪರಿಶ್ರಮದಿಂದ ಸ್ಯಾಂಡಲ್ವುಡ್ನ ಮುಂಚೂಣಿ ಡ್ರಮ್ಮರ್ ಆಗಿ ಹೊರಹೊಮ್ಮಿದ್ದರು. ಸಂಗೀತ ಮಾಂತ್ರಿಕ ಇಳಯರಾಜ, ನಾದಬ್ರಹ್ಮ ಹಂಸಲೇಖ ಮತ್ತು ಸಾಧು ಕೋಕಿಲ ಸೇರಿದಂತೆ ಭಾರತೀಯ ಚಿತ್ರರಂಗದ ದೈತ್ಯ ಸಂಗೀತ ನಿರ್ದೇಶಕರ ತಂಡಗಳಲ್ಲಿ ಪ್ರಮುಖ ವಾದಕರಾಗಿ ಸೇವೆಯನ್ನು ಸಲ್ಲಿಸಿದ್ದರು.
ಸಂಗೀತ ನಿರ್ದೇಶಕರಾಗಿಯೂ ಸೈ ಎನಿಸಿಕೊಂಡಿದ್ದ ದೇವ
ಕೇವಲ ವಾದನಕ್ಕಷ್ಟೇ ಸೀಮಿತವಾಗದೆ, ದೇವ ಅವರು ಸಂಗೀತ ನಿರ್ದೇಶಕರಾಗಿಯೂ ಸ್ಯಾಂಡಲ್ವುಡ್ನಲ್ಲಿ ಗುರುತಿಸಿಕೊಂಡಿದ್ದರು. ‘೫ ಈಡಿಯಟ್ಸ್’ ಹಾಗೂ ‘ಪ್ರೀತಿ ನೀ ಹೀಂಗ್ಯಾಕೆ’ ಮುಂತಾದ ಸಿನಿಮಾಗಳಿಗೆ ಇವರು ಸಂಗೀತ ಸಂಯೋಜಿಸಿದ್ದರು. ದೇಶ-ವಿದೇಶಗಳಲ್ಲಿ ನಡೆದ ನೂರಾರು ಬೃಹತ್ ವೇದಿಕೆ ಕಾರ್ಯಕ್ರಮಗಳಲ್ಲಿ (Stage Shows) ತಮ್ಮ ಡ್ರಮ್ಸ್ ಜಾದೂ ಮೂಲಕ ಪ್ರೇಕ್ಷಕರನ್ನು ತಲೆದೂಗುವಂತೆ ಮಾಡಿದ್ದರು.
ಚಿನ್ನಸ್ವಾಮಿ ಅಂಗಳ ಹಾಗೂ ಆರ್ಸಿಬಿ ಮೇಲಿನ ಅಪಾರ ಪ್ರೀತಿ
ಡ್ರಮ್ಮರ್ ದೇವ ಅವರಿಗೆ ಕ್ರಿಕೆಟ್ ಹಾಗೂ ನಮ್ಮ ಹೆಮ್ಮೆಯ ಆರ್ಸಿಬಿ (RCB) ತಂಡದ ಮೇಲೆ ವಿಪರೀತ ಪ್ರೀತಿಯಿತ್ತು. ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಐಪಿಎಲ್ ಪಂದ್ಯಗಳು ನಡೆದಾಗಲೆಲ್ಲಾ, ಇವರ ಎಲೆಕ್ಟ್ರಿಕ್ ಬೀಟ್ಸ್ ಮತ್ತು ಚುರುಕಿನ ಡ್ರಮ್ಸ್ ಸದ್ದು ಕ್ರೀಡಾಂಗಣಕ್ಕೆ ಹೊಸ ಕಳೆ ತರುತ್ತಿತ್ತು. ತಮ್ಮ ವಾದನದ ಮೂಲಕ ಕ್ರಿಕೆಟ್ ಪ್ರೇಮಿಗಳನ್ನು ಹಾಗೂ ಅಭಿಮಾನಿಗಳನ್ನು ಸದಾ ಹುರಿದುಂಬಿಸುತ್ತಿದ್ದ ಇವರು ಆರ್ಸಿಬಿ ಫ್ಯಾನ್ಸ್ ವಲಯದಲ್ಲಿ ಅತ್ಯಂತ ಜನಪ್ರಿಯರಾಗಿದ್ದರು.
ದೇವ ಅವರ ಅಕಾಲಿಕ ನಿಧನಕ್ಕೆ ಕನ್ನಡ ಚಿತ್ರರಂಗದ ಗಣ್ಯರು, ಸಂಗೀತ ಕ್ಷೇತ್ರದ ದಿಗ್ಗಜರು ಹಾಗೂ ಸಾವಿರಾರು ಆರ್ಸಿಬಿ ಅಭಿಮಾನಿಗಳು ತೀವ್ರ ಕಂಬನಿ ಮಿಡಿದಿದ್ದಾರೆ.
